Martijjes 45

Afspeulliest op Spotify

Eigelk moe'w weer terug hen de cd, lp of baandties of veur aandere streamingsdiensten kiezen die eerlijker bint en gien narigheid in de U.S.A. understeunt. Maor goed: ik heb dus toch ok een afspeulliest maokt in Spotify

Afspeulliest op Youtube

Hier kuj de afspeulliest op Youtube luustern.

De 45 mooiste liedtiesliest

And So It Goes - Billy Joel 

Luuster maor ies goed naor dizze wonderschone tekst. Het feit dat Billy Joel hef bedacht dat er een roemte in je hart een ‘sanctuary safe and strong’ kan weden gef mij al kippevel. Een veilig en stark heiligdom. Aj luddevedut hebt, gef dat al troost, toch? Vertrouw op je eigen hart. Daor kunt de wonden van je liefdesverleden helen. Schitterend. Maor dan verderop zingt Billy Joel ok nog “So I would choose to be with you, that’s if the choice were mine to make. But you can make decisions too. And you can have this heart to break.” Het toppunt van kwetsbaor weden. As ik mag kiezen, kies ik veur je. Hier hej mien hart. Breek het maor aj dat wilt. Zo mooi. En dan an het end ok nog: bin jij de ienige die dit wet. Niet allent de tekst van dit wat mij betreft mooiste lied van Billy Joel is briljant. Luuster maor ies naor al die pianoakkoorden met spanning. Sus-akkoorden bint dat. Die geeft spanning die wilt oplossen.

Abraca Me - Blof & Fernando Lameirinhas

Omhels me dan is in het Portugees Abraca Me. Hiel mooi duet van Pascal van Blöf en Fernando Lameirinhas. De tekst en de melodie vind ik betoverend mooi. As het ritme van de cajon (percussieinstrument) inzet, kriej vanzölf een glimlach. Als de mannen verderop in het lied deur mekaor hen zingt, komp de emotie recht bij je binnen.

Aguas De Marco - Jobim & Regina

Waters of March, wereldberoemde bossa. Door Jobim en Elis Regina zölf. Dit bestun al veur ik geboren was. Het ritme van de gitaar brengt je metien in een soort achteroverleun-stand. Veural an 't end moej wel metbewegen met de muziek, zo swingend. En heur ies de lol die ze saomen hebt tiedens het zingen. As ze an het end al improviserend woorden naor mekaor gooit. Dat is niet allenig hiel goed timed maor ok een genot um naor te luustern. Ok al verstao je de taol niet, nog aal geweldig mooi!

All Night Long – Jacob Collier met Metropole en Take 6

Het lied is beroemd deur Lionel Richie, dizze versie denk ik niet. De stem van Jacob Collier is sowieso uniek, zien talent ok. Zien stem hef een soort softe klaank. Veurdaj an het begin van het lied deurhebt waor de eerste tel precies zit, bi’j wel even bezig. Dizze productie met al die geluudsdingegies vin ik nogal briljant. Je heurt zoveul kleine details en versieringen veurbijkomen. Maor het swingt ok gigantisch zunder daj dikke drumstellen heurt. En dan de meerstemmigheid van under andere de zangers van Take6. Het is een soort wereldreis, dit lied. Wordt leuker aj het origineel ok kent. Ongeveer halverwege kreg het een ongelovelijke lift, bij mij biggelen dan de traonen over de wangen. En dan de blaozerssolo. Gewoon luustern dit. Niet ien keer.

Als Wij Niets Doen - Soldaat Van Oranje

Heurde ik veur het eerst in de musical Soldaat van Oranje. Mooiste lied van de veurstelling. Ok het miest raok qua tekst. Indrukwekkend koorwark. Met The Serenade Sisters waoras ik in zing, hebt wij dizze ok oetbracht, maor dan veerstemmig. Het is een fijn lied um te zingen, vanwege de musical-melodie en de tekst. Dizze tekst is nou weer, tachtig jaor laoter, zo verschrikkelijk waor.

Anthem – Espen Eriksen Trio

Kwam ik tegen op een afspeulliest. Instrumentaol. Zo mooi. Zo rustig. Zo troostend. Zo verlichtend en opbeurend. De piano as groot medicien. Ik heb miestal dat een melodie mij raokt vanaf moment ien. Was bij dizze zo. Ik hoop daj dat ok hebt. Een kedogie

Arm Land - The Lion King

Ik hol van musical. Der is wel ien dingegie. As der zungen wordt met dikke vibrato’s, vind ik dat soms niet mooi. Dat is gewoon een kwestie van smaok. De Lion King van zoveul jaor leden in het Circustheater was aans. Alle zangers zungen met vlakke lijnen. Meer Afrikaanse traditie in de zang. Mien eigen zangjuf vertelde dat ze met dit zanggezelschap juust hieran werkt had. Wij nuumt dat wel 'rechtdeur zingen'. Ik hol dervan. In dit lied zingt Nala over heur moederland dat under druk stiet. En ze zingt dat zo verschrikkelijk goed. Ach, die hiele musical is fantastisch. Al die meerstemmige koorzang met Afrikaanse sferen. Ien grote bak met kippevel. Maor dit lied kwam bij mij ok echt binnen.

As De Liefde Maor Blef Winnen - Daniel Lohues

Daniel Lohues hef verschrikkelijk veul mooie liedties maokt. Het leukst daorbij is dat de teksten miestal zo herkenbaor waor bint. De manier waorop hij de dingen bezingt. In een soort Drentse nuchterheid die wij allemaol zo waardeert. Maor wat ik zo mooi vind an dizze is dat het juust wat meeslepender is, misschien wel wat on-Drents romantisch in die zin. En natuurlijk een hiele mooie pianopartij.

Blackbird – Gregory Porter

Ien van de miest beroemde liedties, van de Beatles. Maor dan met de STEM van jazz-zanger Gregory Porter. Zo warm. Zoveul soul. Zo swingend. Dus dan hej ien van de mooiste liedties met ien van de mooiste stemmen saomen te pakken. Mag niet untbreken op mien liest

The Age of Worry - Yebba

Over mooiste stemmen spreuken. Yebba heb ik nog niet zo lang leden ontdekt. De souplesse van Maria Carey (jeweetwel: van All I Want For Christmas) in heur strottenhoofd en een luchtige, engelachtige sound in heur stem. Asof ze je betovert. Die stem kan ik uren naor luustern. Zij mag het telefoonboek der met zingen. Dit lied is trouwens van singer songwriter John Mayer. Een advies veur de The Age of Worry. De tekst moej echt even goed luustern. Build your heart an army to defend your innocence. Ik denk an mien (tiener)jongens en hoop dat ze zelfverzekerd in het leven komt te staon. Hiel mooi. Het lied moduleert elke keer, de toonsoort veraandert. Asof je in een rivier van verhaolen zwemt. Betoverend mooi dit.

Belief - John Mayer

Metien de snaredrum en dan de basgitaar met basedrum as intro. Toen ik dit veur het eerst heurde, was ik metien um. De groove van gitaar, bas en drums die zachiesan opbouwd wordt en dan der het hiele lied deur! En dan het thema van het lied! Iederien löp maor achter zien geleuf an.

We wint de oorlog nooit as geleuf is waor wij veur vecht. IJzersterk dit. Hef mij al meerdere autoritties tot traonen roerd, dit lied. Je moet eigelk de hiele plaot van John Mayer luustern. Continuum. Kan weden dat ik em al stukluusterd heb. Zo goed!

Bie ‘t Wotter – Harry Niehof

Grunnegse collega Harry Niehof hef hiele mooie plaoten maokt. Ik kreeg Twijduustern een keer cadeau. Stuk veur stuk mooie liedties maor dit vin ik denk ik de mooiste al was het lastig kiezen. De melodie en de romantiek in de tekst, wauw. Mooie productie met een trompetsolo. Wat ik ook mooi vin is hoe lui Harry dit zingt. En zien Grunnegs vuult veur mij as thoes. Ik heb naomelijk ok Grunnegse roots en 'vrouger' klunk der ok Ede Staol bij oes thoes. 

Believe in it – Michael McDonald

Ik hol al hiel lang van zien stem. Michael McDonald. Ooit leadzanger van de Doobie Brothers. Blue Eyed Soul. Hij wordt soulful en warm, zunder rauwe raandties. Ik heb altied periodes dat ik een bepaolde plaot an ien stuk deur luuster en niet meer loslaoten kan. Dit lied heb ik volgens mij een jaor of tien leden al ies kapotdreeid. Het mooiste stuk vin ik as an het begun de snare-drum de band 'anzet', as de rustige intro west is. Virtuose pianopartij. En dan in het refrein vraog en antwoord met koorties. Het is gewoon lekker. 

Bridge over troubled water - Jacob Collier, John Legend, Tori Kelly

Wereldberoemd lied dat ok al veul older is as ik. 9 jaor older um precies te weden. Van Simon and Garfunkel. Daor bin ik met opgruid. Op cassettebaanties. Dizze oetvoering is der nog niet zo gek lang. Het is een soort reis naor de hemel. Ze kunt allemaol geweldig zingen, Jacob, John en Tori. Met open mond zul je luustern naor heur kunsten. John Legend döt allereerst zien achternaom eer an en zingt zien stuk fantastisch. Met soms ok een enorme vibrato en - floeps - in zien kopstem en weer terug. Jacob Collier zörgt veur alle meerstemmige achtergronden, die gewoon regelrecht briljant bint. Waj misschien niet weet, is dat het eerste stukkie zungen is deur zangeres Yebba. Luuster maor ies, het klinkt aans.  De eerste daomesstem die zingt is aans as de leste daomesstem die zingt. Tori Kelly is de leste stem en zij begunt hiel zachies en warm, maor godallemachtig wat pakt zij oet. Ik mus evenpies vief minuten blieven zitten toen ik dit lied veur het eerst luusterd had. Ik hoop daj net zo opstijgt as ik aj dit luustert. 

Chips & Dip Extra Chuncky – Sam Greenfield

Zo swingend, niet normaol. De klank van die haost lachende saxofoons die blaost zo het ochtendhumeur oet je pokkel.  Of aj argens aans op de dag ies sjaggerijnig bint, zet je dit op. Zo over! Echt fantastisch dit. 

Daft Punk – Pentatonix

Pentatonix is fenomenaol met heur meerstemmigheid en beatboxer. Ik heb ze live zien en ze bint het echt net zo goed as op de band. Dit is een feest veur oren die moderne meerstemmigheid holdt

De Mooiste Meid Van Slien – Harm & Roelof

Ien van de eerste liedties die ik mijzelf heb leren speulen op de piano toen ik nog kind was. Ik heurde het op de radio. We vunden het bij oes in hoes allemaol een schitterend mooi lied met die typische Harm en Roelof meerstemmigheid derin.  Mien breur en ik kregen bij elke verjaordagsvisite min of meer de opdracht um het veur de visite te zingen.

Eleanor Rigby – Cody Fry

Cody Fry is jong en briljant. Mak hiele orkeststukken, maor zingt ok pop en jazz. Ik hol van de manier hoe as hij zien stem gebroekt, toch wat jazzy denk ik. Maor hier heur je hum veural als arrangeur en producer. Een fenomenale bewarking van het beroemde lied van de Beatles. Op driekwart van het lied, legt e het stil en begunt een koor. Echt niet normaol zo mooi. Je blieft ademloos achter aj dit luustert hebt (denk an goed geluud zodaj dat orkest goed heuren kunt). Echt briljant dit. 

Evenwicht – Jan Henk de Groot

Grunnegse Collega Jan Henk de Groot schref prachtige liedties. Dizze hakte derin as een bakstien toen ik hum veur het eerst luusterde. Kwetsbaor over oet balans weden. Kwam in dezölfde tied oet as mien album Evenwicht. Ik heb wel wat met het thema 😉. Het begunt met een hiel mooi gitaor tokkeltie die je het hiele lied heurt en daorbovenop bouwt hij langzaom het lied verder oet. Boudel schier in evenwicht. Sferisch en schitterend mooi lied.

Fields of Gold – Eva Cassidy

Ien van de mooiste liedties van Sting en deur al veul artiesten daon. Maor tegen Eva Cassidy kunt der maor weinig op. Die stem was echt fantastisch. Ok veuls te jong overleden, al jaoren leden. Maor de muziek van Eva blef springlevend.

Frauen regier’n die Welt – Roger Cicero

Duitse jazz van een zanger die in 2016 veul te vroeg plotseling is overleden. Heerlijk lied. Swingt de pan oet. Laot mij even weten watoj van de tekst vindt aj hum luusterd hebt. Kein Boss und kein Actionheld. Kein Staat und kein Mafiageld. Frauen regiern die Welt. Ik vin het hilarisch goed. 

Hark! The Herald Angels Sing

Take 6 is fantastisch en dit kerstlied is zo strak en mooi zungen. Close harmony en fluweel veur de oren. 

Haus am See – Peter Fox

Dit lied kwam in hetzölfde periode oet as mien eerste album Drezz en dat weet ik nog goed. Moderne productie met beats en haost een soort van rap waormet hij zingt. De nonchalance waormet hij zingt is heerlijk. Een lekkere beat en dan die Yeah die je in de productie veurbij heurt komen. Mooie bosschup ok. 

Home – Cory Wong

Underweg naor huus is dit lied hiel fijn, terwijl het landschap an je veurbijtrekt. Cory Wong is een fantastische gitarist. Der is gien zang neudig hier want de gitaor en de piano vertelt je het verhaol wel. Elke laogie is heurbaor, totan een subtiele hammond en snaredrum an toe. Dit is mien favoriete veur op de hunebed highway

How Long – Paul Carrack

Aj van mooie stemmen holdt, dan kuj niet veurbij gaon an Paul Carrack. Dizze opnaome is hiel lekker, met die inmense spanning in het intro waoras hij eigelk het verhaol al vertelt. Maor as dan de groove van het liedje inzet, verandert het van spannend naor lekker. Zien stem en de koorties bint unveranderlijk goed. 

I can’t make you love me – Bonnie Raitt

As ik old mag worden zoas Bonnie, doe ik het derveur. Wat een vrouw! Ik heb heur oflopen jaor nog zien op het Holland Blues Festival in Grol. 76 jaor old en dan zo op het podium staon! Ze meuk gehakt van Trump met een stoerheid waoras je u tegen zegt. En heur stem döt het nog gewoon! Dit lied hef een speciaol plekkie in mien hart. Ik heb het op tig bruloften zungen met de coverband Re5al. Wij muzikanten geneuten dervan um dit lied te speulen. En het is zo waor as een koe: “Ik kan je niet dwingen um van mij te holden.” Zo breekbaor. Melodie en akkoorden bint ok nog ies arg mooi, met veul sus- akkoorden die een spanning geeft die geern wilt oplossen. 

I choose you – Sarah Bareilles

Lang heb ik zöcht naor het lied van Sarah Bareilles wat dan op dizze liest zul moeten. Heur album The Blessed Unrest heb ik stukdreeid. Eigelk zul je dat as album moeten luustern en niet ien lied deroet moeten pakken. Het iene stuk is te melancholisch, het aander te zwaor. Dizze is positief met een verliefde boodschap, I choose you. Wat zo heerlijk is an dit lied maor ok an de hiele plaot is alle laogies van productie die as je heurt. Echt geproduceerde popmuziek gecombineerd met de mooie soulfulle stem van Sarah mak het heerlijk um naor te luustern. Het album is dus ok fantastisch.

Landslide – Stacey Kent

Beroemd lied van Fleetwood Mac, maor dan in een oetvoering van jazz zangeres Stacey Kent. Zo mooi naturel zingt zij zunder gedoe of versiering. Soms met een kleine vibrato, met een hiele dudelijke oetspraok van de tekst. Lied is zölf al niet veur niks wereldberoemd, maor deur dizze artieste kreg het nog meer karakter. Puur en prachtig. 

Living without you – Mathilde Santing

Veurdat ik hen het conservatorium gung luusterde ik veul naor Mathilde Santing. Ik har zowat al heur cd’s. Ik was fascineerd deur heur stem die extreem licht en zacht is. Dit is echt heur handtekening en dat mak heur een unieke zangeres. Op ien van die cd’s zingt zij het repertoire van Randy Newman, een beroemde Amerikaanse singer songwriter. Dit lied spant veur mij de kroon: de frisheid, het daansen van de piano, de combi van instrumenten en die heldere, engelachtige stem van Santing. Echt een anraoder veur een frisse zundagmörgen met een koppie koffie, waorbij je een beetje veur je oetstaort.

Migration End Titles – John Powell

Filmmuziek heurend bij animatiefilm Vogelvlucht. Heb ik met de kinder zien. Ik daog je oet um de eendensnaoter te vinden. Is supergrappig en ok leuk om met een klas te ontdekken. Verder schitterend mooi. Maor ja, dat kuj wel an John Powell overlaoten: mooie filmmuziek maoken. Het koor derin met allemaol ‘pam pam pam’. Ik krieg niet genog van dat koor.

Midnight in Harlem – Tedeschi Trucks Band

Susan Tedeschi en Derek Trucks bint as koppel leider van een megagrote band die ik ok al een keer live heb zien speulen op het Holland Infernational Blues Festival in Grol. Zangeres en gitarist Susan Tedeschi zingt altied een beetje rauw maor net niet rauw genog um de stem naor de knoppen te helpen. Der zit mega veul ziel in heur stem wat ik arg mooi vind. De solo’s die gitarist Derek Trucks speult bouwt miestal op van hiel verstild naor ontzettend virtuoos en daorin is hij wal redelijk briljant. Dit is ien van de best beluusterde songs van dizze band die nog redelijk mellow klinkt. Ik word van dit lied altied hiel relaxed. Komt ok van de hammond en de koorties …en de gitaor die echt as een sprekende stem tussendoor komp. Heerlijk. Maor luuster ok veural al die andere muziek van de Tedeschi Trucks. Aj van blues en gospel holdt, maj dat niet missen.

November – Iiro Rantala

Instrumentaol van een Finse pianist. Zo mooi dit. Zo troostriek, zo passend bij november of de herfst. Het lied vuult as een warme wollen jas of omhelzing. De zun breekt zachies deur halverwege het stuk. Gao hier veur zitten. Het is te mooi um der zomaor an veurbij te vliegen. 

October Sky – Yebba

Triestheid ten top. Yebba heur moeder stapte oet het leven toen de zangeres nog jong was. Ze zingt over een herinnering die ze hef en je heurt in de tekst de verwarking. Liefdevol. Ik vun het op de ien of aandere manier herkenbaor, het deed me denken an mien pap die der ok zölf oet stapte. Het lied lat je zweven deur de roemte. Ik zee bij een ander lied in dizze liest al dat Yebba um mij het tillefoonboek mag zingen, dan nog klinkt het fantastisch. 

O Come, All Ye Faithful - Pentatonix

Pentatonix klinkt bij oes regelmaotig op de boxen in de periode veur kerst. Het viefkoppige close harmony gezelschap is zoo goed en komp daorum een paor keer op dizze liest veur. Dit schitterende universele kerstlied mag niet ontbreken. Met moderne benadering deur de beat-boxer. 

Petite messe solennelle: I. Kyrie. Kyrie Eleison – Rossini

Van ‘t zummer volgde ik een dirigentencursus in Utrecht. De hiele week les in dirigeren, technieken, inspiratie en ok daogelijks zölf in een koor zingen. De hiele week was veurnaomelijk inricht op klassieke muziek en daor bin ik met mien achtergrond in de lichte muziek wat minder in thuus. Op het ‘grootkoor’ repeteerden we daogelijks under andere dit stuk van Rossini. Ik zung met bij de hoge sopranen. Het was zo indrukwekkend, het is zu’n verschrikkelijk mooi stuk. De eerste keer dat het complete stuk repeteerd was en volledig klunk heb ik bij stiekem stilholden um te genieten van de klaanken. De inzet van elke stem apart, eerst bassen, tenoren. Pas daarna alten en sopranen en dan langzaam toe naor een hoogtepunt. En die piano die dan maor ritmisch deurspeult. Niet normaol zo mooi dit stuk. Der bint veul versies te vinden, maor niet allemaol even mooi. Je had het natuurlijk live in Utrecht moeten heuren afgelopen zummer ;-)

Run To You – Pentatonix

Mooie, verstilde, gevulige close harmony van Pentatonix veur melancholische momenten. Veur donkere daogen, veur mistige landschappen. En dan: “Ik zal naor je toerennen” … liefde ten top

September Grass – James Taylor 

Ga maor ies liggen in het gras in september en luuster dan naor dizze van Jamer Taylor. Dit lied kuj doezend keer luustern en elke keer heur je toch weer wat aans. De tromroffel die soms even in het drumritme veurbijikomt. De koorties under het refrein. De nasale en typische klank van James Taylor zien stem. Dit hiele album is geweldig mooi: October Road, en de titelsong van dat album ok. 

Shed a Little Light - James Taylor

Mooie boodschap. Mooie meerstemmigheid met een koor an het begun. En dan begunt langzaom met een stijgende pianoakkoordenlijn en verhaol. De drum en bas volgt en zo start het lied echt ritmisch. Van stichtelijk naor stellig. Met vraog en antwoord. Eigenlijk hef James Taylor gien lillijke liedties maokt. Dus wederom lastig kiezen. Maor dizze heb ik keuzen vanwege het hoge gospel gehalte. An 't end eindigt het weer mooi korig. 

Stop This Train – John Mayer

Miestal luuster ik eerst naor muziek, melodie en akkoorden. Daornao pas naor tekst. Hier ok. Eerst heur je een mooie kabbelnde gitaorpartij waor de rest vanzölf bijkomp. Maor aj dan de tekst derbij pakt!! Wil iemand de trein van de tied evenpies stilzitten? Mooi beeldend ‘one generation’s length away from fighting life out on my own’. Zakdoeken vol heb ik al reerd bij dit lied. 

Starting Here Again – Venice

Mark van de band Venice is ok ien van de zangers diej moet beluustern aj van mooie stemmen holdt. Klein hesig raandtie. Veul soul. Schitterend liefdeslied van een fantastische band. Alle cd’s kopen! Ok de kerstalbums. The family tree van dizze band is redelijk beroemd. Maor dit is toch denk ik mien favoriet, al is het lastig kiezen in al het repertoire van Venice. 

Saint Honesty – Sarah Bareilles

Ik hol van de 6/8 maotsoort. Een wals als het waore. Aj naor het album Amidst the Chaos van Sarah Bareilles luustert, koj veul moois tegen. Ok het nummer Armor vin ik te gek. Maor dizze qua opbouw en qua gospel-achtige klaanken wilde ik je toch echt even metgeven. En zij hef een fantastische stem. Luuster naor de lange "rain"!!

The Crown Main Title – Hans Zimmer

Filmmuziek. Hier luuster je veural naor het begun van het lied. De spanning in de tweestemmige klank van het örgel. (Volgens mij is het een örgel). Daornao komt der nog een hiele lading an film-orkest-spanning bij, fantastisch mooi. Maor veural de eerste maoten van dit stuk spreekt mij an. Ik heb de serie keken en elke keer bij dit begun heul ik mien aodem in, zo spannend, dizze muziek. 

The Feeling – Sammy Rae & The Friends

Hoe kuj nou zo crispy zingen!? Het klinkt haost kinderlijk! En die melodie giet alle kaanten op met soms een kleine vibrato. Wat een feest is dit. Hier kuj niet stil bij blieven zitten. Nao het eerste couplet gef de band der een klein beetie feest bij, maor as dan het refrein begunt, stao dan maor op van je stoel! Blaozers, swingende band, la la la la op de achtergrond. Heerlijk. Maor het miest mooi vind ik toch de stem van Sammy Rae. 

The Living Years – Paul Carrack

Dizze boodschap gef mij elke keer kippevel. Every generation blames the one before. All of their frustration, comes beating on your door... I should have told him in the living years. Vertel de belangrieke dingen zolang het kan. Ik vind het zu'n mooie tekst. En dan met die stem van Paul Carrack. En dan ok nog met die constante gitaorlick die in het hiele lied klinkt. Gooi der ok nog een groot koor bij en ik druk aal opnei op repeat. Mooie opbouw ok in dizze versie met orkest. 

The Way It Is – Cory Wong

Grote hit van Bruce Hornsby, maor nou in een oetvoering van Cory Wong met het Metropole Orkest. En op de zang Cody Fry. Verslavend lekker. Cory Wong zien funky gitaorspel saomen met het weergaloze orkest is gewoon een golden combinaotie. Wel zorgen veur goede boxen heur, want aans heur je al die diepte niet in het geluud!

Reactie?

Woj mij laoten weten watoj van dizze liest vindt? Kan via social media, kan via de mail of abonneren op mien mailingliest lek mij ok schier toe. Bedankt veur je andacht en veul plezeer met luustern.